Era unha idea...
Os primeiros pasos
O que foi pasando en 2025
Ao principio tocaba probar e descubrir. Probamos, cambiamos, equivocámonos e volvimos probar. Todo naceu das ganas de experimentar e ver ata onde podiamos chegar.
Fomos atopando os aromas que nos gustaban, dando forma ás nosas primeiras ideas e entendendo pouco a pouco que queriamos transmitir con ALUNE.
Despois chegaron as primeiras vendas. E aí foi cando nos demos conta de que aquilo que empezara case como unha curiosidade podía converterse en algo real.
O noso primeiro gran pulo
Decembro, 2025
Na Aldea Nadal, en Vilagarcía, sacamos ALUNE do noso pequeno mundo.
Puidemos coñecer a moita xente, falar do que faciamos e ver de primeira man como recibían os nosos produtos. Fíxonos especial ilusión descubrir que todo aquilo que foramos construíndo tamén podía ter un lugar fóra de nós.
Ademais, empezamos a aparecer en prensa, algo que non esperabamos e que fixo que máis xente coñecese ALUNE.
Foi entón cando pensamos:
«Isto pode ir a máis».
E Alune empezou a viaxar...
2026
Comezamos a ir a mercados e feiras. A montar o noso pequeno posto, preparar cada detalle e pasar o día falando con quen se achegaba a coñecer o que facíamos.
Pouco a pouco fomos coñecendo persoas, escoitando as súas historias e descubrindo como as nosas velas podían formar parte dos seus propios momentos e recordos.
Despois tocaba desmontar, recoller todo e volver a preparalo para o seguinte mercado. E así, un detrás doutro, fomos percorrendo distintos lugares e vivindo experiencias que non imaxinabamos cando empezamos.
Cada mercado deixounos algo diferente e permitiunos coñecer un pouco máis as persoas que hai detrás de ALUNE. E, case sen nos decatarmos, tamén nos axudou a levalo un pouquiño máis lonxe.
Dun proxecto a un lugar
2026
Chegou un dos pasos máis importantes para ALUNE: abrir a nosa propia tenda física.
Comezamos cun espazo baleiro e, pouco a pouco, fomos dándolle forma ata convertelo nun lugar que sentísemos noso.
Houbo que pintar, reformar e cambiar de idea máis dunha vez. Tamén apareceron imprevistos que nos obrigaron a buscar solucións e reformular algunhas cousas.
Non todo saíu á primeira, pero cada decisión achegábanos un pouco máis ao que tiñamos na cabeza. Foron moitas horas de traballo e tamén de aprender sobre a marcha.
Ata que un día miramos ao redor e vimos que aquel espazo xa se parecía a ALUNE.
E como unha imaxe vale máis que mil palabras, deixámosvos algunhas imaxes de parte do proceso.
ALUNE abriu as súas portas
Xuño, 2026
Despois de meses imaxinando, preparando e dando forma a todo o que queríamos crear, chegou o momento de abrir as portas.
ALUNE deixou de ser só unha idea. Por fin tiñamos un lugar onde ensinar todo o que tiñamos ido construíndo.
Un espazo ao que vir, coñecer os nosos produtos, descubrir aromas e, sobre todo, atoparnos coas persoas que ata entón só imaxinabamos ao outro lado.
Abrir as portas de ALUNE foi facer realidade algo que levaba meses tomando forma.
De facer velas a algo máis
2026
Ao principio, ALUNE eran as velas. Despois chegaron novos aromas, outros produtos e tamén novas ideas.
Démonos conta de que non queriamos quedar soamente en facer velas. Apetianos crear un espazo onde atopar cousas que tivesen algo en común con ALUNE e coa nosa forma de ver as cousas.
Así foron chegando a cosmética natural, os xabóns artesanais, produtos para o fogar, o autocoidado e pequenos detalles pensados para gozar do cotián.
E pouco a pouco, ALUNE foi medrando ata converterse en algo máis que unha tenda de velas.
Detrás de todo isto estamos nós, Sara e Carlos
Xuño, 2026
Detrás de cada pedido, de cada mercado e de cada vela que forma parte de ALUNE estamos Sara e Carlos.
Somos quen estamos á fronte de cada día, coidando que todo saia como queremos e poñendo a nosa forma de facer as cousas en cada parte do proxecto.
ALUNE foi medrando connosco e converteuse, pouco a pouco, nunha parte importante da nosa vida. Temos moitas ideas por facer realidade e moito camiño por percorrer, pero hai algo que temos claro: queremos seguir construíndo ALUNE á nosa maneira.
E isto non fixo máis que empezar
2026
ALUNE cambiou moito desde aquelas primeiras probas e seguramente seguirá facéndoo.
Seguiremos creando coleccións, buscando produtos diferentes, preparando proxectos e dando forma a todas esas ideas que temos en mente.
Queda moito por descubrir e moito por facer.
2027 está por escribir. Anímaste?